咚咚咚咚咔咔咚。。。一入機舖就會聽到響亮嘅打鼓聲！《太鼓之達人》無論喺機舖定係NDS都係熱門遊戲。今年佢15歲啦！將軍澳東港城將會喺今個夏天舉行全港首個「東港城 X 太鼓之達人運動會」。現場除咗會有5000呎嘅實景裝置、15隻全新造型1:1立體公仔之外，仲會設置《太鼓之達人の比拼專區》，俾大家試玩最新嘅《太鼓之達人》。機舖越執越少，想打太鼓！？咁就要去東港城啦！
今次太鼓之達人運動會嘅構思其實係切合番即將舉行嘅奧運會，所以主辦單位特登用「夏日運動祭」為主題，加上「和田咚」同「和田咔」化身成15個不同運動嘅健將，令到東港城即刻變身成一個超得意嘅運動場。
1. 3D腳踏發光單車
架單車係可以俾大家坐上去嫁！當大家踩嘅時候，單車嘅發電裝置就會啟動，令車下面嘅彩虹燈光逐一亮起，太鼓主角們亦會發光。
2. 3D太鼓造型鞍馬
係，我承認我有係公園扮過體操選手咁跳嚟跳去，不過好似唔夠真實，依個鞍馬睇落唔錯！可以扮佢地空中旋轉3週半完美落地（其實無離開過地下） 再影番張靚相！不過，小心安全。
3. 3D太鼓保齡球
萌到爆嘅太鼓保齡球！保齡球樽上面嘅太鼓仲有唔同表情！
4. 太鼓足球小將
講到運動又點少得足球？不過依個太鼓版連草地都係佢個樣，唔知會唔會吸引多啲女士鍾意呢？
5. 風帆之達人
港隊曾經喺奧運會風帆項目入面奪金，所以又點少得佢呢！
6. 太鼓之大力士
100KG 無難度！仲可以擺定個靚靚姿勢影相！
7. 太鼓當入樽
令小編諗起機舖入面另一個熱門遊戲 籃球機！不過依度個主角可愛好多～（哭）
《太鼓之達人》充氣波波彈彈床
4.5米高嘅《太鼓之達人》充氣波波彈彈床 ，裡面放滿不同款式嘅充氣波波，小朋友可以入去瘋狂彈跳！
日期：2016年7月9日 至 8月31日（逢星期五、六及日）
地點：東港城一樓展覽場
時間：下午一時至六時
參加辦法：於東港城即日以電子貨幣消費滿港幣$200*（憑最多兩間不同商戶的即日機印發票及相關的電子貨幣付款存根），即可免費玩《太鼓之達人》充氣波波彈彈床一次。
《太鼓之達人比拼專區》
玩太鼓唔一定要去機舖嘅，去東港城露番兩手啦。今次東港城特設《太鼓之達人比拼專區》，大家可以玩到由官方提供嘅《太鼓之達人》街機，有新version嫁！
日期：2016年7月9日 至 8月31日（逢星期五、六及日）
地點：東港城一樓展覽場
時間：下午一時至六時
《太鼓之達人》期間限定店
香港好少地方可以買到《太鼓之達人》嘅精品，甚至可以話係無，今次粉絲們有福了，東港城為大家搜羅咗20款精品，全部都係獨家發售。
日期：2016年7月9日 至 8月31日（逢星期五、六及日）
東港城 太鼓之達人運動會
日期：2016年7月9日 至 8月31日
地點：東港城一樓展覽場
時間：上午十時至下午十時
No comments:
Post a Comment