【台南街頭小食節】

嚟緊4月30日 - 5月2日，

台灣觀光局、台南市政府觀光旅遊局及荷里活廣場將會攜手呈獻【台南街頭小食節】，

到時會有8大人氣老字號來港，等一眾香港嘅朋友有機會一嚐台南街頭小食！

荷里活廣場喺3月31日率先舉辦記者會，更加邀請到其中4間小店提早來港煮佢地嘅招牌菜俾我地試食，而家就等小編為大家介紹下呢4間小店啦！

集品蝦仁飯 - 蝦仁飯配鴨蛋湯

與台南逾90年老店「矮仔成」系出同門，受日治時期嘅蓋飯所啟發，
【蝦仁飯】係用台南特產火燒蝦所制嘅蝦仁與蔥段爆香快炒，
白飯與醬汁混和，再將蝦仁蓋在飯上，讓食者品嚐到味道既濃、肉質有嚼勁嘅蝦仁飯。

小編食評：必食！蝦仁飯真係會食到上癮！用柴魚淆制嘅鴨蛋湯又濃又鮮甜！絕對要一試！

虱目魚主題館 - 虱目魚水餃

虱目魚又名「思念的魚」，係台灣人最喜愛的海鮮之一。
有「虱目魚女王」之稱嘅虱目魚主題館店主盧靖穎，
為咗令大家可以品嚐到虱目魚背鰭（台南人稱為魚菲力）位置獨有嘅香滑味道，
於是開發咗純魚肉水餃。一條虱目魚只得兩條魚菲力，一條魚菲力就只係足夠製作一粒水餃，即係話一條魚只係整到兩粒水餃！而且，要食無骨嘅虱目魚並唔係一件容易嘅事，事關一條虱目魚就已經有222條魚骨，要起哂所有骨出黎真係需要師傅強勁嘅臂彎同刀功！所以話虱目魚水餃實在係彌足珍貴嘅水餃！

小編食評：食入口就會感到好濃嘅魚香味，而且魚肉好滑，唔小心就好似會自動流入喉嚨！美中不足嘅係，覺得水餃皮厚左啲！如果薄啲就100分啦！

楊哥楊嫂肉粽店 - 精緻肉粽

楊哥楊嫂本在一棵榕樹下經營小雜貨店，因為睇到工人嘅辛勞而泛起憐愛關懷之心，
啟發佢哋親自包肉粽以讓工人裹腹。今次楊哥楊嫂為大家帶來與別不同嘅肉粽，
將粽葉以手折成碗狀，再加入生糯米、香菇、肉塊及鴨蛋黃等豐富材料，
適合同一家大細、朋友一同品嚐。

小編食評：同廣東人整嘅粽有啲唔同，唔會有紅豆、綠豆，由於材料豐富，唔需要落調味料就已經好入味，而且粽嘅大小適中，女生食都唔會話太飽，食完仲可以試其他小食！

北門鹽鄉民宿餐廳 - 蚵仔麵線配西瓜綿虱目魚丸湯

店主以當地食材炮製蚵仔麵線配西瓜綿虱目魚丸湯，將盛產食鹽的北門歷史發揚光大。
西瓜綿係鄉下地區獨有食材，農民由於唔想浪費長得唔美觀嘅西瓜，佢哋會喺種西瓜時，
將長得比較小嘅西瓜先拔掉，再用鹽醃製成美味醬菜，由此帶出「惜食」概念。
北門無工業污染，潟湖海域平靜，當地使用吊掛式養殖法，蚵仔被潮汐落差沖洗，
所以北門蚵仔肉質會更彈牙。

小編食評：西瓜綿虱目魚丸湯酸酸鹹鹹好開胃，用虱目魚製嘅魚丸好彈牙而且好鮮甜。
即開即煮嘅蚵仔非常鮮甜，完全無腥味，麵線好軟滑，原來蚵仔麵線無加湯反而突出咗蚵仔嘅味道，令人想一食再食！

試食會當天更有即場表演5分鐘去222條魚刺 (圖)

除左上述4款台南小食，仲有馬英九總統激讚嘅「竹蓮子櫻花蝦米糕」、「陽光下的關廟滷麵」、「低碳生活農夫便當」同埋逾半世紀庶民小吃「香腸肉燥飯」，都將會係4月30日黎到荷里活廣場，等香港人都可以一嚐台南味道！

【台南街頭小食節】
日期：4月30日至5月2日
時間：12:00pm - 7:00pm；
            1:00pm 開始美食換領
地點：荷里活廣場一樓明星廣場
換領小食：活動期間每日1:00pm 起，市民只需捐款$20 予港澳台灣慈善基金，即可換領小食一份。每日數量有限，先到先得，換完即止。